दशैको अवसरमा सामुहिक टिका लगाउने कार्यक्रम सम्पन्न

कात्तिक ८, मकवानपुर । सदियौदेखि नेपाली समाजमा विद्यमान जातीय छुवाछुत अन्त्य गर्न मकवानपुरको थाहा नगरको ओखरबजारमा किशोर किशोरीहरुले दशैको अवसरमा सामुहिक टिका लगाउने कार्यक्रम सम्पन्न गरेकाछन् ।

समाजमा दलित समुदायलाई गैर दलित समुदायले गर्ने विभेदको अन्त्य गरी समतामूलक समाज निर्माणकालागि सामुहिक टिका आयोजना गरिएको हो । थाहा नगरको ओखरबजारको दीपज्योति किशोरी संवाद केन्द्रको आयोजनामा भएको कार्यक्रममा संवाद सहयोग समिति संयोजक थकुमाया प्रधान तथा समितिका सदस्यहरु राजनमाया प्रधान, रेणुका प्रधान र राधिका प्रधान र स्थानीय समाजसेवी विमलकुमार ढकाल, रीता प्रधान तथा अच्युतमप्रसाद ढकालको हातवाट स्थानीय दलित र गैर दलित किशोर किशोरीले सामुहिक रुपमा टिका जमरा र आशिष थापेका हुन् ।

विगतमा दलित भनेर छुन नहुने, उनीहरुले छोएको खान नहुने र घर भित्र पसाउन नहुने भनेर विभेद गरिने दलित समुदायलाई पनि विना भेदभाव सबैसंग राखेर टिका लगाउने र खानपिन गर्ने कार्य भएपछि खुसी लागेको सफलता नेपालीले बताउनुभयो । त्यस्तै कार्यक्रममा सहभागी हुनुभएका बिनीसा अमात्यले पनि दलित साथीहरुलाई आफूहरुसंग संगै राखेर टिका लगाउने र खानपिन गराउने कार्यमा सहयोग गरेको प्रति संवाद सहयोग समितिलाई धन्यवाद दिनूभयो । कार्यक्रम संवाद परियोजना अधिकृत कमलकुमार विश्वकर्मा, फिल्ड सुपरभाइजर रुपा सुनारको पनि उपस्थिती रहेको थियो ।

यस्तो कार्यक्रम आगामि दिनमा पनि निरन्तरता दिनूपर्ने इन्द्रायणी संवाद सहयोग समितिका संयोजक सिताराम बयलकोटीले बताउनुभयो । कार्यक्रममा स्मृति किशोरी संवाद केन्द्र, सृजनशील किशोर संवाद केन्द्र र इन्द्रायणी किशोरी संवाद केन्द्रका किशोर किशोरीहरुको सहभागिता रहेको थियो ।
sajhasabal.com