स्वर्गद्वारी मन्दिरबाट अपमानित भएर फर्के दलित दम्पत्ति

दाङ, २९ साउन । प्यूठानमा रहेको पवित्र धार्मिक तीर्थस्थल स्वर्गद्वारी मन्दिरमा अपमानित भएर फर्केको छ एक दलित दम्पत्ति । दाङको त्रिपुर नगरपालिका– ६ सिस्नेरीका ३४ वर्षीय भीम नेपाली र उनकी श्रीमती बसन्ता नेपाली साउन २३ गते बिहान स्वर्गद्वारीबाट अपमानित भएर फर्केको घोराहीमा शुक्रवार आयोजित पत्रकार सम्मेलनमा जानकारी गराइएको छ ।म्बष्तिछोरी सन्ध्या नेपाली ४ वर्षदेखि विरामी भइरहेको र ग्रहशान्ति गर्नुपर्छ भनेपछि आफूहरु स्वर्गद्वारी गएको बसन्ताले बताइन् । “हामी साउन २३ गते बिहान स्वर्गद्वारी मन्दिरमा पुग्यौं । पुजारीसमक्ष छोरीको ग्रहशान्ति गर्न आएका हौं भनेर बतायौं । त्यसपछि पुजारीले भित्र लगेर फेरि हेर्ने कि उतैबाट हेराएर आएको भनेर सोधे । हामीले उता हेराएका हौं यता पनि हेरिदिनुस् भन्यौं । पुजारीले पात्रो निकाल्नु भयो । नाम र ठेगाना सोध्नु भयो । हामीले नाम, ठेगाना र थर बताएपछि पुजारी झोंक्राउनु भयो र जुरुक्क उठेर जानु भयो”, बसन्ताले भनिन् । “फुर्सद छैन भनेर पुजारी हिडेपछि हामी लज्जित भयौं”, बसन्ताले थपिन्, “अपमानित पनि महसुस भयो ।”

बसन्ताका श्रीमान् भीम नेपालीका अनुसार पुजारी उठेर हिडेपछि गाई हेर्ने पण्डितलाई बोलाइदिएका थिए । गाई हेर्ने पण्डितले गाईको गोठतिर लगी त्यहाँ रहेको सानो मन्दिरमा पूजा गरिदिएको भीमको भनाई छ । गाई हेर्ने पण्डितले आफूहरुलाई धेरै सम्झाउने कोसिस गरेको बताउँदै बसन्ताले थपिन, “हामीले पनि धेरै सोधपुछ गर्यौं । प्रभु महाराजले भनेअनुसार गरेका हौं र समितिको निर्णय पनि यही छ भनियो । सार्वजनिक स्थलमा दलित भनेर अपमानित गर्ने पुजारीमाथि कानुनी कारवाही हुनुपर्छ ।” सबैले मूल मन्दिरमा पूजाअर्चना गरिरहेको र आफूहरुलाई गाईगोठमा भएको सानो मन्दिरमा लगेर पूजा गराउँदा रुन मन लागेको र पीडाले मन्दिरको प्रसादसमेत ग्रहण नगरेर फर्केको बसन्ताले बताइन् । उनको प्रश्न थियो, “धर्मनिरपेक्षताको विरोध गर्दै हिन्दूराष्ट्रको माग गर्ने तर एउटा दलित हिन्दू धर्मकै लाग पूजाअर्चना गर्न जाँदा विभेद किन ?

दलित अगुवा तथा एमाले नेता मानबहादुर विश्वकर्माले सार्वजनिक स्थलमा दलितलाई अपमानित गर्ने पुजारीमाथि कानुनी कारवाही हुनुपर्ने माग गरे । उनले आफूहरु दलित संघर्ष समितिको माध्यमबाट कानुनी प्रक्रियाबाट अगाडि बढ्ने जानकारी दिए । अर्का दलित अगुवा जनक नेपालीले बरु ग्रहशान्ति गरेको ४ हजार २ सय रुपैयाँ फिर्ता गरिदिने तर यो मुद्दालाई नउठाउन पुजारीबाट दवाव आएको जानकारी दिए ।